SHBA paralajmëron Korenë e Veriut për kryerjen e testeve bërthamore

Nëse Koreja e Veriut do të kryejë test bërthamor, do të ketë një përgjigje të fortë dhe të qartë nga Shtetet e Bashkuara, Koreja e Jugut dhe e gjithë bota.

Kështu deklaroi këtë të martë, zëvendës Sekretarja amerikane e Shtetit, Wendy Sherman, shkruan Reuters.

“Çdo test bërthamor do të ishte në kundërshtim të plotë me rezolutat e Këshillit të Sigurimit të OKB-së dhe do të kishte një përgjigje të shpejtë dhe të fuqishme ndaj një diçkaje të tillë. Unë besoj se jo vetëm Koreja e Jugut, Shtetet e Bashkuara dhe Japonia, por e gjithë bota do të përgjigjen në një mënyrë të fortë dhe të qartë”, tha ajo në një konferencë për shtyp pas takimit me homologun e saj koreano-jugor, Cho Hyun-dong, në Seul.

Deklarata e Sherman, vjen pasi Koreja e Jugut dhe SHBA lëshuan tetë raketa të hënën, në përgjigje të një breshërie raketash balistike të lëshuara nga Koreja e Veriut, dy ditë më parë.

Shteti i izoluar komunist ka testuar dhjetëra raketa në muajt e fundit, duke përfshirë një raketë balistike ndërkontinentale për herë të parë në pesë vjet.

Rruga Press