Orkestra Simfonike e Kievit vazhdon turneun “Zëri i Ukrainës”

Orkestra Simfonike e Kievit – ndoshta më e famshmja në Ukrainë – kishte planifikuar të interpretonte në kryeqytet me tenorin gjerman Matthias Goerne si të ftuar më 4 mars.

Por, pas sulmit nga forcat ruse në qytet, anëtarët e Orkestrës Simfonike të Kievit u detyruan të kalonin natën në një bodrum, një garazh parkimi nëntokësor dhe në stacionin hekurudhor, ka treguar dirigjenti kryesor Luigi Gaggero.

Tani, ndërsa lufta vazhdon në Ukrainë, spektakli do të vazhdojë gjatë turneut “Voice of Ukraine”, i cili nisi javën e kaluar me dy koncerte në Poloni.

“Për shkak të domosdoshmërisë dhe rëndësisë së luftimit të agresionit të Rusisë në çdo mënyrë të mundshme, me përgjegjësinë më të lartë dhe nderin e madh, Orkestra Simfonike e Kievit po shkon në një turne evropian për t’u bërë zëri i fuqishëm i Ukrainës në botë”, ka treguar Orkestra në një deklaratë për medie.

“Muzikantët ukrainas duhet të bëhen zëri i Ukrainës dhe zëri i atyre ukrainasve që për shkak të agresionit ushtarak të Rusisë nuk e kanë më atë”, shkruhet në deklaratë.

Orkestra Simfonike e Kievit ka përgatitur një program që paraqet muzikën orkestrale ukrainase që nga fillimi i saj në vitet 1770 deri te kryeveprat e shekullit 20. Violinistët ukrainas me famë botërore Diana Tishchenko dhe Oleksii Semenenko do të luajnë si solistë me orkestrën.

Orkestra thotë se do të ruajë pjesëmarrjen e saj në trashëgiminë kulturore kontinentale dhe do të performojë si pjesë e “një familjeje të madhe evropiane”.

Orkestra Simfonike e Kievit gjithashtu deklaroi se muzikantët nuk kanë nevojë të largohen nga Ukraina dhe do të kthehen pas turneut dhe se ekipi kishte “punuar në organizimin e një turneu për t’u bërë zëri i Ukrainës jashtë vendit për shkak të nevojës së diplomacisë kulturore gjatë luftës”.

Qëllimi kryesor i turneut është t’ia kujtojë Evropës realitetin e luftës në Ukrainë dhe t’i bindë njerëzit për nevojën për të rritur mbështetjen financiare dhe ushtarake për Ukrainën për të ndihmuar kombin që t’i rezistojë agresionit rus.

“Ata duhet të dinë këtë informatë të trishtueshme për atë që po ndodh në Ukrainë, të bindin opinionin publik evropian, apo edhe më shumë politikanë evropianë, se ne duhet të veprojmë me vendosmëri”, ka thënë zëvendëskryeministri ukrainas Piotr Glinski, i cili është gjithashtu ministër i Kulturës dhe Trashëgimisë Kombëtare.

Rruga Press