Shpërthime të fuqishme në Kiev pas fundosjes së anijes luftarake ruse

Rusia do të rrisë numrin dhe shtrirjen e sulmeve me raketa ndaj objektivave në Kiev në përgjigje të sabotimit në territorin e saj nga forcat ukrainase, raporton Interfax, duke cituar Ministrinë ruse të Mbrojtjes.

Shpërthime të fuqishme u dëgjuan në Kiev të premten dhe luftimet u ndezën në lindje, pasi Ukraina mori përgjegjësinë për fundosjen e anijes ruse në Detin e Zi, në atë që do të ishte një nga goditjet më të rënda të luftës.

Shpërthimet ishin ndër më të rëndësishmet në rajonin e kryeqytetit të Ukrainës, që kur trupat ruse u tërhoqën nga zona në fillim të këtij muaji në përgatitje për betejat në jug dhe në lindje.

Nuk pati raportime të menjëhershme për dëme pas shpërthimeve të raportuara në Kiev, Kherson në jug, qytetin lindor të Kharkiv dhe qytetin Ivano-Frankivsk në perëndim.

Forcat e armatosura të Ukrainës thanë se sulmet ruse në qytetet Popasna dhe Rubizhne, të dyja në veri të qytetit-port të Mariupolit, ishin zmbrapsur dhe një numër tankesh dhe automjetesh të tjera të blinduara ishin shkatërruar.

Ukraina tha se goditi kryqëzuesin raketor Moskva me një raketë Neptun. Anija e epokës sovjetike u mbyt të enjten, teksa po tërhiqej në port pas një zjarri dhe shpërthimesh, tha Ministria ruse e Mbrojtjes. Mbi 500 anëtarë të ekuipazhit u evakuuan, tha ministria, pa pranuar sulmin.

Humbja e anijes vjen, ndërsa marina ruse vazhdon bombardimet e saj ndaj qyteteve ukrainase në Detin e Zi, gati 50 ditë pasi pushtoi vendin për të çrrënjosur atë që e quan nacionalistët e ekstremit të djathtë.

Rruga Press