Muzeu i Seulit s’pranon t’ia kthejë veprat e artit Rusisë, kundërpërgjigje ndaj pushtimit të Ukrainës

Një galeri arti në Seul, në Korenë e Jugut, ka refuzuar t’i kthejë veprat e artit në Rusi.

Qendra Sejong për Artet e Performancës në Seul nuk po i kthen 75 veprat që ka huazuar nga katër muze të ndryshëm rusë.

Në 75 veprat e artit nga 49 artistë të mëdhenj rusë dhe sovjetikë, përfshihen edhe Ëassily Kandinsky, Kazimir Malevich, Alexander Rodchenko dhe Natalia Goncharova.

Shumica e veprave ishin huazuar nga Muzeu i Arteve të Bukura në Yekaterinburg, me vepra të tjera të dhëna gjithashtu nga Muzeu Shtetëror i Artit i Nizhny Novgorod, Muzeu i Artit Krasnoyarsk Surikov dhe Muzeu i Artit të Lindjes së Largët.

Veprat ishin huazuar për ekspozitën “Kandinsky, Malevich dhe avanarda ruse” që do të zgjaste deri më 17 prill. Por një zyrtar i Muzeut të Ekaterinburgut kërkoi mbylljen e parakohshme të ekspozitës deri më 3 prill për shkak të “situatës së vështirë politike”, raporton The Korea Times.

Koreja e Jugut i është bashkuar shumë vendeve të tjera në dënimin e luftës së Rusisë ndaj Ukrainës dhe ka miratuar sanksione kundër shtetit rus.

Koreja e Jugut u përfshi me SHBA-në dhe BE-në në ndalimin e transaksioneve me bankën qendrore të Rusisë, megjithëse ka bërë një përjashtim për disa eksporte të lidhura me teknologjinë në Rusi.

Tani muzeu me seli në Seul ka refuzuar të përmbushë kërkesën e vendit për t’i kthyer veprat e artit herët. Ekspozita, e bashkëdrejtuar nga Korea Times dhe Hankook Ilbo do të vazhdojë si ishte planifikuar fillimisht, pretendon Hankook Ilbo. “Ne do t’i përmbahemi kontratës dhe do ta mbajmë ekspozitën deri në datën e premtuar.”

Rruga Press