Konfindustria kërkon ndryshime në qeveri

Konfindustria ka kërkuar ristrukturim të kabinetit qeveritar me krijimin e dy ministrive të reja.

Gjergj Buxhuku, administrator i përgjithshëm i Konfindustrisë përmes një deklarate për mediat kërkoi nga qeveria krijimin e Ministrisë së Energjisë dhe Ministrisë së Ekonomisë dhe Tregtisë si ministri me portofol të veçantë.

Këto ndryshime sipas Konfindustrisë, janë të domosdoshme në kushtet e ‘menaxhimit të dobët të krizave shkatërruese në energji, karburante si dhe çrregullimit masiv të tregjeve’.

”Kriza e energjisë si pasojë e keqmenaxhimit të plotë të rezervave të KESH gjatë vitit 2021 me shenja të dukshme korrupsioni; spekulimet tregtare të shitje-blerjes së energjisë; mosvënia në punë prej vitesh e Bursës së Energjisë APEX; vonesat në zbatim të projekteve energjetike të ripërtëritshme; çmimet e larta, cilësia shumë e dobët dhe moskontrollet e rezervës së 3 mujore të karburanteve; arbitrazhet ndërkombëtare etj., janë vetëm disa shembuj që arsyetojnë kërkesën e mësipërme”, thuhet veç të tjerash në njoftimin e Konfindustrisë.

Rruga Press