Zelensky do t’i drejtohet Kongresit derisa SHBA-ja premton 800 milionë dollarë ndihmë ushtarake

Presidenti i Ukrainës, Volodymyr Zelensky do të mbajë një fjalim virtual në Kongresin Amerikan të mërkurën.

Zelensky pritet të përsërisë kërkesën e tij për një zonë ndalim-fluturimi, duke rritur presionin mbi SHBA-në dhe aleatët e saj.

Fjalimi vjen pasi Presidenti i SHBA-së Joe Biden do të njoftojë për një ndihmë ushtarake shtesë prej 800 milionë dollarësh për Ukrainën.

Paratë do të shkojnë për armët kundër-blinduese dhe kundërajrore, si Stingers dhe Javelins, raportojnë mediat amerikane.

Financimi mbulohet nga një projekt-ligj për shpenzimet për ndihmën humanitare, mbrojtëse dhe ekonomike për Ukrainën që u miratua nga Kongresi javën e kaluar.

Duke nënshkruar projektligjin të martën, Biden tha se sulmi i presidentit rus Vladimir Putin ndaj Ukrainës kishte bashkuar njerëzit në mbarë botën.

Në vitin e kaluar, administrata Biden ka ofruar 1.2 miliardë dollarë armë për vendin, duke përfshirë helikopterët Mi-17, anije patrullimi dhe armë të vogla si granatahedhës dhe mitralozë, raporton New York Times.

Rruga Press