Dua Lipa merr pjesë dhe mban fjalim në inaugurimin e shkollës së parë shqiptare në Texas të Amerikës

Këngëtarja shqiptare me famë botërore, Dua Lipa, është duke zhvilluar turneun e saj “Future Nostalgia” në Shtetet e Bashkuara të Amerikës.

Me këtë rast, ajo ka pasur fatin që të këndojë në shtete të ndryshme të kontinentit amerikan, për të performuar dhe promovuar këngët e albumit me të njëjtin titull, “Future Nostalgia”.

Sigurisht që ajo është gjithmonë gati t’iu përgjigjet pozitivisht ftesave për të takuar bashkëkombësit e saj kudo ku ndodhet apo edhe të marrë pjesë në manifestet shqiptare kudo ku organizohen.

Së fundmi, interpretuesja e hitit “New Rules” ka marrë pjesë në inaugurimin e shkollës së parë shqiptare në Texas të Amerikës.

Këtë ajo e bëri të ditur përmes një sërë fotografish që i ndau me ndjekësit e saj në rrjetin social Instagram.

“Një nder të isha pjesë e hapjes së shkollës së parë shqiptare në Texas sot”, shkroi Dua në mbishkrimin e një fotografie në InstaStory.

“Qendra promovon kulturën shqiptare, artin dhe muzikës derisa ofron gjuhën [shqiptare] nga klasat 5-15 vjeç”, shkroi këngëtarja në një tjetër fotografi gjatë fjalimit të saj në inaugurim.

Më tej, artistja me rrënjë shqiptare publikoi edhe një fotografi të përbashkët të realizuar me të gjithë nxënësit e kësaj shkolle, ku shiheshin duke bërë simbolin e shqiponjës me duar. 

Rruga Press