“Po përdor taktika terrori”- Qeveria e Ukrainës akuzon ushtrinë ruse se ka rrëmbyer kryebashkiakun e dytë
Qeveria e Ukrainës ka akuzuar ushtrinë ruse për rrëmbimin e një kryebashkiaku tjetër në një zonë të pushtuar.
“Yevhen Matveyev u rrëmbye në qytetin jugor të Dniprorudne”, tha ministri i Jashtëm ukrainas, Dmytro Kuleba në një postim në Twitter, duke akuzuar Rusinë për taktika “terrori”.
Më herët, Rusia emëroi një kryebashkiak të ri në Melitopol, pasi dyshohet se rrëmbeu kryetarin e mëparshëm të qytetit.
Presidenti i Ukrainës akuzoi gjithashtu Rusinë se po përpiqet të krijojë “pseudo-republika” për të copëtuar vendin e tij.
Në daljen e saj të parë publike, kryetarja e sapo-instaluar e Melitopolit, Galina Danilchenko u kërkoi banorëve të mos merrnin pjesë në “aksione ekstremiste” dhe deklaroi se detyra e saj kryesore ishte ndërtimi i “mekanizmave bazë sipas realitetit të ri”.
Qindra njerëz morën pjesë në një protestë jashtë bashkisë të shtunën për të kërkuar lirimin e kryebashkiakut Ivan Fedorov, i cili kishte refuzuar të bashkëpunonte me trupat ruse pas pushtimit të qytetit në ditën e tretë të sulmit.
Fedorov u pa për herë të fundit mbrëmjen e së premtes duke u tërhequr zvarrë nga qendra e qytetit nga disa njerëz të armatosur me një çantë mbi kokë.
Zyrtarët ukrainas shpërndanë një video dhe pretenduan se personat e armatosur ishin ushtarë rusë.
“Ne s’do bashkëpunojmë me rusët në asnjë mënyrë”, tha Fedorov për BBC në fillim të javës. “Ata nuk janë përpjekur të na ndihmojnë, nuk mund të na ndihmojnë dhe ne nuk duam ndihmën e tyre”.
Autoritetet ruse nuk kanë komentuar zhdukjen e tij, por zyra e prokurorit të rajonit separatist të Ukrainës lindore të Luhansk, e mbështetur nga Rusia, thuhet se e ka akuzuar atë për “veprimtari terroriste”.
Presidenti ukrainas Volodymyr Zelensky ka kërkuar lirimin e menjëhershëm të Fedorov dhe u ka kërkuar liderëve të Izraelit, Gjermanisë dhe Francës që të bëjnë presion ndaj Rusisë për ta liruar atë.
Në fjalimin e tij të fundit mbrëmjen e së shtunës, Zelensky tha se Rusia po krijonte “pseudo-republika” në Ukrainë.
Rruga Press