Lufta Rusi-Ukrainë, edhe Bosnja kërkon anëtarësimin në BE

Pas Ukrainës, Gjeorgjisë e Moldavisë edhe Bosnje Hercegovina ka kërkuar t’i jepet statusi kandidat për t’u anëtarësuar në Bashkimin Evropian. Kërkesa është bërë nga anëtari kroat i presidencës së vendit dhe nuk ka pëlqimin e atij serb, Millorad Dodik.

Anëtari kroat i Presidencës së Bosnje Hercegovinës, Zeljko Komsiç i dërgoi një kërkesë zyrtare të martën Bashkimit Evropian për dhënien e statusit të vendit kandidat.

Kjo është hera e parë që vendi kërkon të bëhet shtet anëtar i bllokut evropian.

Sipas Komsiç, marrja e statusit kandidat për në BE do të forconte sigurinë dhe sovranitetin e vendit.

Ai shtoi se kërkon gjetjen e një mënyre për të përshpejtuar procesin drejt anëtarësimit të plotë, duke marrë parasysh tendencat e ngjarjeve gjeopolitike në lindje të Evropës.

Në letër, Komsiç theksoi nevojën për ta parë Ballkanin Perëndimor si pjesë të Evropës në mes të luftës së Rusisë kundër Ukrainës.

Sekretari i Përgjithshëm i NATO-s javën e kaluar ka deklaruar se Bosnja Hercegovina dhe Gjeorgjia rrezikohen nga konflikti për shkak të influencës ruse në këto dy shtete.

Në Bosnje Hercegovinë, anëtari serb i presidencës, Millorad Dodik i cili njihet për marrëdhëniet e mira me presidentin rus, Vladimir Putin nuk ka guxuar të dënojë Rusinë për sulmin ndaj Ukrainës në 24 shkurt.

Kujtojmë që më herët gjatë këtij muaji, statusin e vendit kandidat për t’u anëtarësuar në BE e kanë kërkuar, Gjeorgjia, Moldavia dhe Ukraina, pikërisht për tensionet në lindje të kontinentit.

Rruga Press