FSK-ja pret që Fondi i Sigurisë t’ia rrisë kapacitetet

Mjetet financiare të Fondit të Sigurisë do të kenë ndikim që Forcat e Sigurisë së Kosovës të ngrenë kapacitetet e tyre, ka thënë koloneli Sefer Isufi.

“Forcat tona do të ngirisn e gatishmërinë operacionale në secilën fushë e veprim sektorial që ato mbulojnë”, ka thënë Isufi.

Për shkak të situatës në Ukrainë, ai tha se FSK-ja e ka rritur vëmendjen.

“Kemi konsideru se duhet të ngrisim edhe vigjilencën dhe vëmendjen maksimale të gjitha mekanizmave tanë të brendshme”, shtoi ai.

Ndërsa Plator Avdiu, hulumtues në Qendrën Kosovare për Studime të Sigurisë, thotë se shteti nuk duhet të mjaftohet me këtë fond.

“Kosova edhe nëse e rritë buxhetin e FSK-së prapë nuk mund të bëjë shumë për shkak se buxheti i Kosovës është shumë i vogël apo tek fondet qysh është ky i sigurisë”, ka pohuar Avdiu.

Megjithatë, këtë praktikën e fondit e sheh krejt normale.

“Është praktikë normale dmth, kjo e kërkimit të mbështetjes financiare për forcën e sigurisë, duke pasur parasysh që forca e sigurisë i posedon disa kufizime”, shtoi ai.

Ekzekutivi të martën ka vendosur që të krijojë Fondin e Sigurisë, gjë që u mundëson qytetarëve në Kosovë dhe diasporë që të dhurojnë mjete për institucionet e sigurisë.

Figura publike, biznese e aktorë të tjerë në shoqëri, shprehën gatishmërinë e tyre për të dhuruar para për Ushtrinë.

Vëmendja tek ushtria u kthye pasi Rusia po e sulmon Ukrainën, ndërsa Serbia nuk e njeh ende Kosovën si çështje të mbyllur.

Rruga Press