Zvicër/ Përparim Avdili, një tjetër fitues shqiptar në zgjedhjet lokale

Përparim Avdili, është një tjetër shqiptar që ka dalë fitues nga zgjedhjet lokale të mbajtura ditën e djeshme në Zvicër. Lajmin e ka bërë të ditur vetë Avdili dje në mbrëmje pas shpalljes së rezultatit të zgjedhjeve të mbajtura më 13 shkurt.

“Miq, jam rizgjedhur me rezultatin më të mirë në listën e FDP-se në rrethin 9. Faleminderit të gjithëve, përzemërsisht” shkruan ai.

Përparim Avdili ka lindur në Zvicër, por nuk e ka mohuar kurrë origjinën shqiptare, përkatësisht nga Kumanova, një qytet që është pjesë e Maqedonisë së Veriut. I rritur dhe shkolluar në Zyrih, Përparimi punon në sistemin bankar prej vitesh. Por së fundmi është përfshirë edhe në politikë.

Gjatë një interviste televizive ai ka treguar se edhe pse shqiptarët janë të përfshirë në partitë politike, bashkëkombësit e tyre nuk janë shumë të interesuar për të marrë pjesë në zgjedhje. “Pjesëmarrja e shqiptarëve në zgjedhjet komunale është diku te 15%, edhe pse kanë nënshtetësi zvicerane, nuk marrin pjesë. Dhe unë dua t’u tregoj që ia vlen. Brenda partisë liberale janë edhe 3 femra të tjera shqiptare, që nuk kanë post aktualisht. Edhe te partitë e majta ka disa kandidatë në lista. Por prapë jemi kundërshtarë politikë, në aspektin ideologjik, kuptohet. Në Zvicër janë 350-400 mijë shqiptarë. Që është shumë se 8 milionë banorë janë në total”.

Rruga Press