Falsifikuan dokumentin/ Këshilli i Qarkut Vlorë pezullon drejtorin dhe specialistin

Kreu i Këshillit të Qarkut të Vlorës Ervis Moçka ka pezulluar nga puna ditën e sotme Bardhyl Gjikën dhe Kreshnik Minon, dy punonjës të Drejtorisë së Administrimit dhe Mbrojtjes së tokës pas akuzave se kanë falsifikuar një dokument dhe kishin inskenuar më pas vjedhjen e tij.

Drejtori i Drejtorisë së Administrimit dhe Mbrojtjes së tokës, në Këshillin e Qarkut të Vlorës Bardhyl Gjika dhe Kreshnik Mino, specialist  dyshohet se inskenuan vjedhjen e disa ditëve më parë të dy AMTP-ve, të pronave të bregdetit konkretisht të fshatit Dhërmi.

Burime nga policia raportojnë se një AMTP dhe formulari 6 i regjistrimit të një pronë truall ishim falsifikuar në favor të Spiro Duni. Dyshohet se çështja pronësore e familjes Duni po gjykohet pasi janë ngritur pretendime për falsifikime. Organet e drejtësisë kanë kërkuar dokumentet origjinale dhe për të mos u zbuluar falsifikimi, funksionarët e këshillit të Qarkut, kanë sajuar vjedhjen e tyre. Këto dokumente janë origjinale vetëm në këtë zyrë dhe nuk janë administruar nga ASHK.

Ditën e sotme, policia e Vlorës ka vënë në pranga tre persona që akuzohen si të përfshirë në grabitjen e zyrat e pronave të këshillit të qarkut Vlorë 3 ditë më parë. Bardhyl Gjika me detyrë Drejtor i Drejtorisë së Administrimit dhe Mbrojtjes së Tokës, pranë Këshillit të Qarkut Vlorë, në bashkëpunim me specialistin e kësaj drejtori shtetasin Kreshnik Mino, dhe shtetasin Spiro Duni, dyshohen se kanë falsifikuar formularët e AMTP dhe Formularin nr.6 për regjistrimin e një pasurie, në fshatin Dhërmi.

Rruga Press