Ish-gjyqtari i ‘Kushtetueses’: Vjosa Osmanit i lejohet të kandidojë në zgjedhjet e ardhshme

Kadri Kryeziu, ish-gjyqtar i Gjykatës Kushtetuese në Kosovë deklaroi në Euronews Albania se vendimi i Gjykatës Kushtetuese për rrëzimin e qeverisë Hoti ishte shumë cilësor.

“Unë e pashë mbrëmë vendimin dhe vendimi është shumë cilësor, janë konsultuar të gjitha aktet normative të republikës së Kosovës”, u shpreh ai.

Z.Kryeziu sqaroi se politikanët apo personat që janë dënuar me vendim të formës së prerë nuk mund të kandidojnë në zgjedhje, 3 vite para se të jetë marrë ky vendim.

“Personat që janë të dënuar me vendim të formës së prerë nuk mund të kandidojnë për 3 vitet e ardhshme”, tha ai.

Sa i përket presidentes në detyrë Vjosa Osmanit, z.Kryeziu tha se ajo mund të kandidojë në zgjedhje dhe kjo parashikohet edhe në ligj.

“Edhe kjo është e rregulluar me një vendim të Gjykatës Kushtetuese. Kur jemi në mungesë të presidentit të shtetit këtë detyrë e merr kryetari i parlamentit dhe gëzon të gjitha kompetencat të cilat i ka një president, të garantuara me kushtetutë. E ka vetëm një privilegj, ushtruesit i detyrës ka të drejtë të merret me politikë dhe të jetë konkurrent në garë për parlamentin e Kosovës. Osmani ka kohë dhe kjo është e rregulluar me ligj”, u shpreh ai. /Euronews

Rruga Press