Konsultimet për hartën e re gjyqësore; avokatët kundërshojnë shkurtimin e gjykatave

Avokatët në Gjirokaster dhe Sarandë kanë paralajmëruar ankimimin e projektit në Gjykatën Administrative si dhe pezullimin e përkohshëm të liçensave nëse projekti do të shkojë për zbatim.

Këshilli i Lartë Gjyqësor zhvilloi të premten konsultimin e parë në Gjirokastër lidhur me hartën e re gjyqësore. Kjo hartë  riorganizon institucionet e drejtësisë në 12 rrethe gjyqësore dhe vetëm një prokurori apeli duke shkurtuar ndër të tjera gjykatat e rretheve në Sarandë dhe Përmet, si dhe Gjykatën Administrative dhe atë të Apelit në Gjirokastër.

Dhomat e Avokatisë por edhe forume qytetare në dy qytetet Sarandë dhe Gjirokastër e kanë kundërshtuar projektin pasi sipas tyre cënon aksesin e qytetarëve në drejtësi duke krijuar  probleme në ndjekjen e proceseve gjyqësore nga qytetarët, rrit numrin e çështjeve të mbartura  dhe sjell vonesa edhe më të mëdha në trajtimin gjyqësor sidomos  të çështjeve të pronave.

Harta e re gjyqësore e Shqipërisë u  dorëzua në Ministrinë e Drejtësisë  në shtator të vitit të kaluar nga Këshilli i Lartë Gjyqësor.

Avokat Agron Iljazi i Dhomës së Avokatisë Gjirokastër tha se arsyetimi i shkurtimeve të gjykatave për kostot dhe burimet njerëzore nuk qëndron pasi këto probleme janë gjithmonë për sistemin e drejtësisë. Avokati Iljazi propozoi referendum brenda sistemit gjyqësor për hartën gjyqësore duke votuar variantet e sistemit aktual dhe atij që propozohej apo një variant të tretë që do të propozohej pas procesit të konsultimeve.

Ndërsa Avokati Tahir Novit tha se vetë qytetarët preken drejtpërdrejt nga ky riorganizim  dhe harta e re gjyqësore  nuk është e mirëstudiuar. “Nuk është studiuar rritja e madhe e  shpenzimeve  që qytetarët do të duhet të bëjnë për të ndjekur proceset gjyqësore nga këto zona që preken nga shkurtimi i gjykatave,  tha zoti Novi. Sipas tij nuk është marrë parasysh edhe problematika e madhe që u krijua nga përqëndrimi Gjykatës së Apelit Administrativ në Tiranë.

Dhoma e Avokatisë në Sarandë ka argumentuar se gjykata e Sarandës shqyrton mbi 2,300 cështje në vit dhe kjo ngarkesë është më e madhe se Gjykaat e Rrethit Gjirokastër, e cila shqyrton shumë më pak çështje gjyqësore. “Shkurtimi gjykatës  së Sarandës do zvarriste edhe më shumë cështjet e pronave sidomos në zonën e bregdetit,”  tha avokati Gjergji Ymeraj.

Zv. kryetari i Këshillit të Lartë Gjyqësor, Maksim Qoku tha se do të ketë 6 dëgjesa në nivel rajonesh lidhur me hartën e re gjyqësore.

“Përfaqësuesit e Këshillit të Lartë Gjyqësor do të parashtrojnë risitë që sjell kjo reformë ndërsa sugjerimet e grupeve të interesit do të vlerësohen,”  tha zoti Qoku.

“Studimi që i parapriu hartës ka konsideruar një kompleksitet kriteresh dhe në finale qëllimi është eficenca dhe cilësia më e mirë e shërbimeve gjyqësore,” përfundoi ai.

Rruga Press