Sqaron qeveria – Kush do të paguajë më shumë për rrymën?

Propozimet e ZRrE-së, për çështjen e tarifave të energjisë elektrike, janë ende në fazën e konsultimeve, ka bërë të ditur për Klan Kosovën, zëdhënësi i Qeverisë, Përparim Kryeziu.

Megjithatë bazuar në propozimet aktuale, ai tha se me subvencionim të qeverisë, rritje të çmimit të energjisë do të ketë për konsumatorët shtëpiakë që shpenzojnë mbi 600kWh, transmeton Klan Kosova.

”Duhet të kemi parasysh se propozimet e ZRrE-së janë ende në fazën e konsultimeve, megjithatë duke u bazuar në propozimet aktuale, me subvencionim të Qeverisë, nuk do të ketë rritje të çmimit të energjisë për konsumatorët shtëpiakë që shpenzojnë deri në 600kWh”.

Kryeziu, mes tjerash sqaroi në detaje për Klan Kosovën, se kush pritet të paguajë më shumë për energjinë elektrike.

”Familjet që shpenzojnë më shumë se 600kWh, 600kWh e para i kanë pa rritje kurse për shpenzimet mbi 600 kWh pritet të aplikohet rritja. Në kuadër të kësaj rritje, ZRrE ka propozuar që çmimi për tarifën e lartë të jetë 0.21 cent për kWh kurse për tarifën e ulët 0.09 cent për kWh”.

”Pas subvencionimit të qeverisë tarifa e lartë pritet të bëhet 0.14 cent kurse ajo e ulëta pritet të jetë 0.06. Pra për shpenzimet mbi 600 kWh, sepse deri në 600 kWh e parë gjithçka mbetet e pandryshuar, çmimi pritet të jetë 0.14 cent në tarifën e lartë dhe 0.06 cent në atë ulët”.

”Për shembull nëse një familje shpenzon 800 kWh, për 600 kWh subvencionohet plotësisht nga qeveria, pra çmimi mbetet i pandryshuar nga çka qenë, kurse për 200 kWh shtesë do të ketë një rritje e cila po ashtu pjesërisht subvencionohet nga Qeveria”.

Rruga Press