Gjenden në Itali, reliket e bombarduesit amerikan të humbur të Luftës së Dytë Botërore

Një gërmim arkeologjik në Siçili ka zbuluar gjurmë të një bombarduesi të rëndë amerikan të humbur të Luftës së Dytë Botërore, i rrëzuar në vitin 1943, dhe mbetje të mundshme njerëzore që mund të çojnë në identifikimin e pesë aviatorëve, trupat e të cilëve nuk u gjetën kurrë.

Gërmimi gjashtëjavor që përfundoi këtë javë u krye nga një ekip i Agjencisë POW/MIA të Pentagonit, i cili zbulon dhe identifikon personelin amerikan ushtarak të zhdukur në mbarë botën.

Vendi pranë Sciacca u identifikua në vitin 2017 nga hetuesit duke përdorur të dhëna historike dhe detektorë metali.

Gërmimet e sivjetme zbuluan rrënojat “në përputhje vetëm me një avion B-25”, tha arkeologu Clive Vella, drejtor shkencor i ekspeditës, duke kontribuar në shpresat se çdo mbetje e konfirmuar do të lidhej me ekuipazhin e zhdukur. “Ne u detyrohemi familjeve (të tyre) përgjigje të sakta,” tha Vella për Associated Press të enjten.

Bombarduesi i rëndë B-25 Mitchell i Amerikës së Veriut me një ekuipazh prej gjashtë vetash ishte një nga 52 humbjet ajrore me personel të zhdukur në zonë gjatë Luftës së Dytë Botërore, kryesisht gjatë vitit 1943 ndërsa aleatët futeshin në Sicilinë juglindore.

Ai u rrëzua ndërsa kishte vënë në shënjestër një pistë ajrore të kamufluar gjermane mes ullishteve dhe kullota më 10 korrik 1943. Një raport ushtarak gjerman dokumentoi rrëzimin e një avioni amerikan rreth dy kilometra (pak më shumë se një milje) nga aeroporti Sciacca, tha Vella.

Rruga Press