Shiroka pa drita, Bashkia e Shkodrës: U grabitën 192 m kabëll elektrik

Bashkia kërkon ndihmën e policisë për arrestimin e personave përgjegjës, pasi kjo vjedhje është rast i përsëritur disa herë.

SHKODËR – Bashkia e Shkodrës denoncoi vjedhjen e 192 m kabëll elektrik në rrjetin e ndriçimit në rrugën e Shirokës. Në faqen zyrtare, bashkia e qytetit raporton se defekti është zgjidhur dhe pas vendosjes së kabllit elektrik është rikthyer energjia elektrike.

Bashkia Shkodër shton se ky nuk është rasti i parë i dëmtimit të rrjetit të furnizimit me energji elektrike në rrugën e Shirokës. Për ngjarjen e fundit është kërkuar dhe vënia në veprim e policisë për të gjetur personat përgjegjës për këtë ngjarje.

NJOFTIMI I BASHKISË SHKODëR

Persona të papërgjegjshëm kanë dëmtuar përmes vjedhjes rrjetin e ndriçimit në rrugën e Shirokës. Janë 192 metër kabëll që janë grabitur, duke bërë që të mungojë ndriçimi publik në një pjesë të aksit që frekuentohet më së shumti nga shkodranët.Njesia e Ofrimit të Sherbimeve e Bashkisë Shkodër, ka ndërhyrë menjëherë duke mundësuar zëvendësimin e kabllit që është grabitur nga keqdashës dhe rikthimin e ndriçimit publik në rrugën e Shirokës.

Fatkeqësisht, ndriçimi publik është dëmtuar disa herë në këtë rrugë dhe është dashur ndërhyrja e Bashkisë Shkodër për zëvendësimin e kabllit elektrik. Përsërisim thirrjen tonë për Komisariatin e Policisë së Shkodrës që të gjejë dhe të vendosë para përgjegjësisë keqbërësit që dëmtojnë pronën tonë të përbashkët.