8 dhjetori, aktivistët protestë përpara Ministrisë së Arsimit! Tubimi me valixhe si simbol të emigirimit masiv të të rinjve nga vendi: Demokracia në rrezik

Aktivistë të Lëvizjes për Universitetin në Tiranë zgjodhën 8 dhjetorin, Ditën e Rinisë për të protestuar përpara Ministrisë së Arsimit dhe Sporteve. Aktivistët protestuan me valixhe ku kishin bashkëngjitur pankartat e tyre, si simbol të për të evidentuar largimin masiv të të rinjve shqiptarë nga vendi.

“Dita e sotme na gjen në krizën më të madhe të besimit tek e ardhmja”- Ky ishte mesazhi që u përcoll nga të rinjtë ndërsa shtruan edhe problematikat që sipas tyre janë më të mëdhatë në Shqipëri. Mungesa e perspektivës, kostot e larta të jetesës, korrupsioni në nivele të larta, rënia drastike e nivelit të arsimit, minimi i demokracisë ishin disa prej arsyeve kryesore që i nxiti aktivistët të protestonin ditën e sotme, që përkon me kthesën historike të vendit nga regjimi komunist në atë demokratik.

Sidoqoftë, rinia dhe populli shqiptarë jetojnë ende në një demokraci të brishtë, ku problematikat e shtetit janë shumë të mëdha, ku prej 33 vjetësh qeverisin të njëjtat forca politike dhe ku ideologjitë mbeten thjesht për populizëm.